Íslendingar vilja árangur áfram - ekkert stopp

Könnun Capacent sem birt er í dag mælir gríðarlega fylgisaukningu Framsóknarflokksins annan daginn í röð og hefur flokkurinn nú tvöfaldað fylgi sitt frá í fyrradag. Vinstri grænir virðast í frjálsu falli og eru komnir niður fyrir fylgi Framsóknarflokksins í fyrsta sinn í langan tíma.

Greinilegt er að þjóðin gerir lítið með andróður andstæðinga Framsóknarflokksins, en vill árangur áfram og ekkert stopp. Jón Sigurðsson, formaður flokksins, hefur komið allra manna mest á óvart í þessari baráttu, haldið ró sinni og jákvæðni þrátt fyrir misjafnt gengi og hefur fyrir vikið öðlast tiltrú margra.

Í könnunum hefur komið fram að nálega helmingur landsmanna vill sjá Framsóknarflokkinn í næstu ríkisstjórn. Það er augljóslega langt umfram fylgi flokksins í skoðanakönnunum. Valgerður Sverrisdóttir, utanríkisráðherra, benti um daginn á það að augljóst væri að Framsóknarflokkurinn færi ekki í ríkisstjórn yrði hann fyrir miklu fylgistapi. Eftir þeim ummælum var tekið og víst er að margir hugsa nú sem svo að besta leiðin til að tryggja veg Framsóknar áfram sé að kjósa flokkinn nú á laugardag.

Á lokasprettinum er ákaflega mikilvægt að hafa vind í seglin, því pólitík er svo fljót að breytast. Þeir sem töldu sig vera með unna stöðu fyrir fáum vikum horfa nú á fylgistap dag frá degi og vita sem er að erfitt er snúa þeirri þróun við. Þetta er sem fyrr spurning um að toppa á réttum tíma.

Þetta verða spennandi lokadagar í kosningabaráttunni.

Fylgi Framsóknarflokksins tekur stökk